လယ်ယာမြေလုပ်ပိုင်ခွင့်ကို ရောင်းချခြင်း ၊ ပေါင်နှံခြင်း ၊ငှားရမ်းခြင်း ၊ ပေးကမ်းခြင်း ၊ အမည်ပြောင်းခြင်း ကို ဒီနှစ်ဇွန်လကစပြီး လုပ်ဆောင်နိုင်ပြီလို့ သိရပါတယ် ။ အရပ်စာချုပ်နဲ့ လုပ်ထားတာတွေကို မဖြစ်မနေ အမည်ပြန်ပြောင်းရမှာလား ။ မပြောင်းဘူးဆိုရင် အဲဒီစာချုပ်တွေ တရားမဝင်ဖြစ်သွားမလား ဆိုတာကို သိပါရစေ။

အလွန်ကောင်းသည့် အမေးဖြစ်ပါတယ်။ လက်ရှိ အောက်ခြေတွင် တွေ့ကြုံနေရသော ပြဿနာ တစ်ရပ်လည်း ဖြစ်ပါတယ်။
လယ်ယာမြေလုပ်ပိုင်ခွင့်များကို ရောင်းချခြင်း၊ ပေါင်နှံခြင်း၊ ပေးကမ်းခြင်း၊ ငှားရမ်းခြင်းနှင့် လဲ လှယ်ခြင်းဖြင့် လွှဲပြောင်းခြင်းများအတွက် ဦးစီးဌာနက သတ်မှတ်သည့် တံဆိပ်ခေါင်းခွန် ထမ်း ဆောင်၍ ရပ်ကျေးလယ်စိရှေ့တွင် စာချုပ်ဆိုရန်နှင့် ယင်းစာချုပ်စာတမ်းများကို စာချုပ် စာတမ်း မှတ်ပုံတင်ခ ပေးဆောင်၍ သက်ဆိုင်ရာမြို့နယ် လယ်စီအင်းဌာနတွင် မှတ်ပုံတင် ခြင်း များ ပြုလုပ် ပြီးနောက် လုပ်ပိုင်ခွင့်ပြုလက်မှတ် ပုံစံ ၇ အမည်ပြောင်းခြင်းများကို (၁.၆.၂၀၁၉) မှ စတင်ပြုလုပ် နိုင်ပြီ ဖြစ်ကြောင်း ကြေညာထားပါတယ်။

ထိုအခါတွင် ယခုမေးခွန်းပါ ယခင်တုန်ုးက မှတ်ပုံတင်မထားတဲ့ အရပ်စာချုပ်နဲ့ လယ်ယာမြေ လုပ် ပိုင်ခွင့် လွှဲပြောင်းခြင်း ပြုလုပ်ထားတာတွေကို မဖြစ်မနေ အမည် ပြန်ပြောင်းရမှာလား ။ မပြောင်း ဘူး ဆိုရင် အဲဒီ စာချုပ်တွေ တရားမဝင် ဖြစ်သွားမလားဆိုတဲ့ အမေးက အများပြည်သူ သိချင် နေတဲ့ အချက် ဖြစ်ပါတယ်။။
၂ ပိုင်းခွဲပြီး ဖြေဆိုချင်ပါတယ်။

ပထမ လယ်ယာမြေဥပဒေ၏ ပြဌာန်းချက်အရ ဖြေဆိုပါမယ်။

၂၀၁၂ လယ်ယာမြေဥပဒေ ပုဒ်မ ၉ (ခ) အရ ပုံစံ ၇ သူဟာ လယ်ယာမြေ လုပ်ပိုင်ခွင့်အား လွှဲ ပြောင်းပေါင်နှံ ရောင်းချ ပေးကမ်းပိုင်ခွင့် ရှိပါတယ်။ လယ်ယာမြေလုပ်ပိုင်ခွင့် လွှဲပြောင်းခြင်း တရားဝင် ဖြစ်စေရန်အတွက် လယ်ယာမြေ နည်းဥပဒေ ၂၄ အရ လိုက်နာရမှာ ဖြစ် ကြောင်း ပြဌာန်းထားပါတယ်။ ယခု မေးမြန်းသည့် အရပ်စာချုပ်များသည် နည်းဥပဒေ ၂၄ အရ ရပ်ကျေး လယ်စီရှေ့မှောက်တွင် ထိုက်သင့်တံဆိပ်ခွန်ထမ်းဆောင်၍ ချုပ်ဆိုထားသည့် စာချုပ်များ မဟုတ် ဟု ပြောနိုင်ပါတယ်။ ထို့အပြင် ချုပ်ဆို စာချုပ်များကို ဦးစီးဌာနတွင် ရက် ၁၂၀ အတွင်း တရားဝင် မှတ်ပုံမတင်ခဲ့သော လွှဲပြောင်းခဲ့ခြင်း ဖြစ်သည့်အတွက် တရားမဝင်သော လွှဲပြောင်းမှု Illegally Transaction ဟု သတ်မှတ်နိုင်ပါတယ်။ ထို့ကြောင့် ယင်းစာချုပ်များ အစား လွှဲပြောင်းမှု စာချုပ် အသစ် ပြန်လည် ချုပ်ဆိုပြီး တရားဝင်မှတ်ပုံတင်မှသာ တရားဝင် လွှဲ ပြောင်းခြင်း အဖြစ် ရောက်ရှိ ပါမယ်။ ယခင်စာချုပ်များသည် တံဆိပ်ခွန် မထမ်းဆောင်ခဲ့ခြင်း၊ ရပ်ကျေးလယ်စီအဖွဲ့၏ ချုပ်ဆိုခြင်း ကို အတည်ပြုခဲ့မှု လုပ်ငန်းစဉ် မရှိခဲ့ခြင်း၊ ချုပ်ဆိုပြီး ရက် (၁၂၀) အတွင်း ဦးစီးဌာနတွင် မှတ်ပုံ မတင်ခဲ့ခြင်းကြောင့် တရားဝင်သည်ဟု မပြောနိုင်တော့ပါ။ မဖြစ်မနေ ပြန်လုပ်ရပါမည်။ ဒါက ဥပဒေ ပြဌာန်းချက် အရ ပြောရခြင်း ဖြစ်ပါတယ်။

ဒုတိယဆွေးနွေးရမည့် အချက်မှာ ၂၀၁၂ လယ်ယာမြေဥပဒေ၊ နည်းဥပဒေပါ လယ်ယာမြေ လုပ်ပိုင် ခွင့် လွှဲပြောင်းခြင်းဆိုင်ရာ ပြဌာန်းချက်များအတိုင်း အဆိုပါ ကာယကံရှင်များ အဘယ် ကြောင့် မလိုက်နာခဲ့ပါသနည်း၊ ဥပဒေနှင့်အညီ ဘာကြောင့် မလုပ်နိုင်ခဲ့ပါသလဲ ဆိုသည့် အချက်ကို မျက် ကွယ် မပြုဘဲ ထည့်သွင်းစဉ်းစားရန် ဖြစ်ပါတယ်။

မေးခွန်းတွင် ဖေါ်ပြထားသည့် တရားမဝင် အရပ်စာချုပ်ဖြင့် လွှဲပြောင်းမှု Illegally transaction ဖြစ်ရခြင်းသည် ကာယကံရှင်များမှ ဥပဒေပြဌန်းချက်ကို ချိုးဖေါက် မလိုက်နာခဲ့ခြင်းကြောင့်လား အဘယ်ကြောင့်ပါနည်းဟု ဆိုသောအဖြေကို ပွင့်ပွင့်လင်းလင်း ဖြေဆိုရပါမည်။ နိုင်ငံတော်မှ ပြဌာန်းသော လယ်ယာမြေဥပဒေ၊ နည်းဥပဒေပါ လယ်ယာမြေလုပ်ပိုင်ခွင့် လွှဲပြောင်းမှု လုပ်ငန်း စဉ်များကို ကာယကံရှင်များ လိုက်နာရန် ပျက်ကွက်ရခြင်း၊ မလိုက်နာခဲ့ရခြင်းမှာ နိုင်ငံံတော်၏ ချို့ယွင်းချက်ကြောင့်သာ ဖြစ်ပါတယ်၊ တစ်နည်း ဆိုရလျှင် လယ်ယာမြေစိမံခန့်ခွဲမှုအား အဓိက တာဝန်ယူဆောင်ရွက်ရသော ဗဟိုလယ်စီအဖွဲ့၏ ချို့ယွင်းချက်ကြောင့်ဟု ပြောပါက မှားမည် မဟုတ်ပါ။

အဘယ်ကြောင့်ဆိုသော် လယ်ယာမြေဥပဒေ၏ ပုဒ်မ ၁၂(ဂ)၊ နည်းဥပဒေ ၂၄၊ ၂၅ များအရ ဆောင်ရွက်နိုင်ရန်မှာ ပုဒ်မ ၁၈ တွင် လယ်ယာမြေလုပ်ပိုင်ခွင့် လွှဲပြောင်းမှု ကိစ္စအတွက် ချုပ် ဆိုသော စာချုပ်များ ချုပ်ဆို မှတ်ပုံတင်ရာတွင် လယ်ယာမြေတန်ဘိုးကို နှုန်းထားသတ်မှတ်ရန် သင့်လျော်သည့်လယ်စိအဖွဲ့အား ဗဟိုလယ်စီမှ လုပ်ပိုင်ခွင့်အပ်နှင်း တာဝန်ပေးရန်ဟု ပြဌာန်းခဲ့ သော်လည်း ဗဟိုလယ်စီမှ မည်သည့်အဖွဲ့အား ပုဒ်မ ၁၈ ပါတာဝန်ကို ပေးအပ်ကြောင်း ဥပဒေ ပြဌာန်းခဲ့သည့် ၂၀၁၂ မှ ယခု ၂၀၁၉ မေလ မတိုင်မီ ၇ နှစ် တိတိကြာမြင့်သည်ထိ အမိန့် ညွှန်ကြားချက် တစ်စုံတစ်ရာ လုံးဝထုတ်ပြန်ခြင်း မရှိ တာဝန်ပျက်ကွက်ခဲ့ပါသည် ။ တောင်သူ လယ်သမားများ၏ လယ်ယာမြေလုပ်ပိုင်ခွင့်များအတွက် ပုဒ်မ ၉ (ခ) ပါ အခွင့်အရေးအရ ဥပဒေနှင့်အညီ လွှဲပြောင်းနိုင်ရန် နိုင်ငံတော်ဘက်မှ ညွှန်ကြားဆောင်ရွက်ပေးရမည့် လုပ်ငန်း စဉ် များကို လစ်လျူရှုထားခဲ့ခြင်းကြောင့် လယ်ယာမြေလုပ်ပိုင်ခွင့် ရသူများမှာ မိမိတို့ အစီအစဉ် ဖြင့် ထိုသို့ ဥပဒေနှင့် မညီသည့် လွှဲပြောင်းမှုများ ဆောင်ရွက်ခဲ့ရသည်ကို မည်သို့မျှ မငြင်းနိုင်ပါ။

လိုအပ်သော ညွှန်ကြားချက်များ ထုတ်ပြန် မပေးခြင်းဖြင့် လယ်ယာမြေလုပ်ပိုင်ခွင့်အား ဥပဒေပါ ပြဌာန်းချက်များနှင့်အညီ တောင်သူများ လွှဲပြောင်းနိုင်ခွင့် အခွင့်အရေးအား မခံစားနိုင်စေရန် ပိတ်ပင်တားဆီး ပြုမူသလို ဖြစ်ခဲ့သည့်အတွက် ယခုကဲ့သို့ တရားမဝင်သော အရပ်စာချုပ်များ ဖြင့် လွှဲပြောင်းမှုများ ဖြစ်ခဲ့ရခြင်းအတွက် နိုင်ငံတော်တွင် တာဝန်ရှိပါတယ်။ ထိုသို့ ဗဟိုလယ်စီ ၏ ပယောဂကြောင့် မှားခဲ့သည့်အမှားဟု ဆိုနိုင်သော (တရားဝင် ချုပ်ဆို မှတ်ပုံတင်ခွင့် မပေး ခဲ့မှု ကြောင့်) တရားမဝင်လွှဲပြောင်းခဲ့ရသည့် အရပ်စာချုပ်ဖြင့် လယ်ယာမြေလုပ်ပိုင်ခွင့် ရောင်း၊ ပေါင်၊ ပေး၊ လွှဲပြောင်းမှုများကို ယခု ၂၀၁၉ မေလတွင်မှ ထုတ်ပြန်သော လယ်ယာမြေ လုပ်ပိုင်ခွင့်များ လွှဲပြောင်းမှုဆိုင်ရာ ညွှန်ကြားချက်များ အရသာ တရားဝင်သည်၊ ယခင် လွှဲပြောင်းမှုများ တရား မဝင် အစမှစ ပြန်လုပ်ရမည်ဟု မျက်နှာလွှဲ ခဲပစ် မလုပ်သင့်ဘဲ နည်းလမ်း တစ်ရပ်ရပ်ဖြင့် မည်သို့ ဆောင်ရွက် ပေးသင့်သည်ကို အဖြေရှာ ဖြေရှင်း ပေးသင့် သည်ဟု ထင်ပါတယ်။

Credit : DVD Law Lab